مفاهيم خاطئة حول نظرية التطور

في كثير ناس عندها مفاهيم خاطئة حول نظرية التطور راح احكي اليوم عن بعضها:


هي نظرية معناها هي مش صح هي مجرد رأي:

والشهير بهاد الادعاء هو الداعية الإسلامي ذاكر نايك، مؤسس ورئيس مؤسسة البحوث الإسلامية، اللي قال "التطور مجرد نظرية هي مش حقيقة فش ولا كتاب يلي بقول حقيقة التطور". هون، الداعية نايك مش عارف الفرق بين الفرضية والنظرية العلمية. نظرية التطور مش فرضية، انما نظرية علمية، زي نظرية الجاذبية. الجاذبية كمان نظرية علمية بس ما منشوف عليها جدال زي التطور والسبب برجع لأنها ما بتعارض الدين. نرجع للموضوع:


س: شو تعريف النظرية العلمية والفرق بينها وبين الفرضية؟


ج: النظرية العلمية هي تفسير لظواهر طبيعية بتصير بالعالم واللي ممكن اختبارها والتحقق منها بشكل متكرر عن طريق أدوات وطرق علمية تجارب الخ.. برضو النظرية العلمية هي أفضل تفسير حتى الان بشرح وبتنبئ بظواهر معينة والعلم متغيير، بعدل نفسه عشان يصير أدق وأضبط عن طريق التجارب والأبحاث الخ... بينما الفرضية هي تفكير وتأمل بظاهرة معينة وإعطاء افتراض أو تفسير مقترح على أساس أدلة محدودة كنقطة بداية لمزيد من التحقيق يعني مش مؤكد 100% بعد بده اختبارات وفحوصات للتأكد منه.


الخلاصة: النظرية العلمية مثبته لأنه بتم التحقق منها وهي مش مجرد فرضية رأي أو تأمل أو استنتاج شخصي بدون أدلة كافية أو مثبتة.




نظرية التطور بتحكي الإنسان أصله قرد:

وهاد المفهوم الخاطئ كثير دارج وشائع وياما تشتمنا وتقلنا يا قردة لأسباب عديده منها اذا كثيرين حركة او اذا ملحدين او اذا بدهن يتمسخروا علينا "انت بتشبه القرد" الخ... ( مش إهانة كلنا كائنات حية بصير فيها تفاعلات بيوكيميائية) المهم:


س: شو نظرية التطور عنجد بتقول؟


ج: هي بتقول إنه البشر والقردة في بينهن سلف مشترك يعني كائن هو مش قرد ولا انسان هو كائن ثالث يلي فيه صفات مشتركة من الإنسان والقرود وتطور ونتج عنه البشر والقردة نتيجة لطفرات وانتخاب طبيعي. نظرية التطور بشكل عام بتشرح كيف الكائنات الحية مش بس الانسان بتتغير مع الوقت نتيجة لتغيرات وراثية فالسمات الجسدية أو السلوكية وهاي التغيرات بتساعد الفصيلة تتأقلم مع البيئة وتساعدها تنجو وتتكاثر أكثر.


النقطتين الاساسيات بنظرية التطور هني:


1. كل الكائنات الحية على الأرض مرتبطة وقريبة لبعض.

2. تنوع الكائنات الحية اجا بسبب التعديلات في الأفراد وهاد التعديل كان عن طريق الانتقاء الطبيعي.




لو نظرية التطور صحيحة كان منلاقي كائنات بين البشر والقردة:

نظرية التطور موجودة قبل مجيء تشارلز دارون بس تشارلز دارون طورها وهو يلي أطلق المصطلح انتقاء/ انتخاب طبيعي. (معلومة إضافية نظرية التطور موقفتش عند شغل دارون في كثير علماء بعده طوروها وضافوا عليها اشياء جديدة).


س: شو يعني انتخاب طبيعي؟


ج: الانتخاب الطبيعي ممكن نشرحه بجملة البقاء للملائم أكثر.


س: شو يعني البقاء للملائم؟


ج: هي القدرة على النجاة والتكاثر.


س: كيف بصير الانتخاب الطبيعي؟


ج: النسل يلي بقدر ينجو بالظروف البيئية ويوصل جيل البلوغ ويتكاثر بتضل جيناته مستمرة بينما الأضعف او النسل يلي بقدرش ينجو او حتى يتكاثر جيناته بتنتقلش فبنقرض والعملية مش بثانية او دقيقة او ساعة لتصير بدها ملايين السنين فبالنهاية التلخيص انه الكائنات يلي كانت بين البشر والقردة ماتت وانقرضت لعدم قدرتها على البقاء والتكاثر وعملية الانتقاء الطبيعي مش مخططة هي عملية عشوائية غير محددة.


وهكذا انتهت حلقتنا لليوم سنستكمل في الحلقة القادمة.


ملاحظة فسفوسة:

شرحت بلغتي وبطريقة بسيطة ما تعمقت عشان أسهل فهم هاي المفاهيم العلمية لأنه مش كل الناس عندها خلفية بيولوجية من قبل إضافة لهيك عشان نبني اساس علمي مشترك لمثالات لقدام يلي راح اتعمق فيهن عن نظرية التطور.


قائمة مصادر:

1. ويكيبيديا - مقالة حول: النظرية العلمية

2. ويكيبيديا - مقالة حول الفرضية

3. موقع scielo




اذا حابب/ة تحضر/ي فيديوهات بتحكي عن الموضوع وبتشرح نظرية التطور بشكل بسيط هدول اكم فيديو




بقلم: #إيمان_شحادة

61 عرض

تواصل معنا

تابعنا

©2020 by adonistore.com 

اقرأني

كن أول من يعرف 
واشترك في النشرة الإخبارية للحصول على أحدث العروض والمعلومات.